ياحزن لاتشرب من عيوني النوم

بسم الله الرحمن الرحيم

مدخل للخيانة

ياسيدي الجرح قلبي يشتكي راعـه
لا الذنب ذنبي ولا الموضوع بيديني
●●●
حبيت واخلصت واثر الحب فقّاعـه
روّح وباقي يموتني ويحييني
●●●
غيري هدر دم عشق وللاسف باعـه
غيري قتل كل حب بحد سكيّني
●●●
وانا الي اصبحت للأخطاء شمّاعـه
وادفع ثمن كل غلطه من محبيني

قديمي المتجدد

هذا انت يا حزني انا وانت هاليوم
جينا على العاده بحلم يتبدد

ياحزن لا تشرب من اعيوني النوم
يكفي انك اجفوني عليها توسد

اقلط على قلب بها اثار واهموم
اقلط بجرح افراقها قبل يبرد

حقيقة اني عقبها صرت مصدوم
وشلون من قلبي عشقها تصدد

غيمة قهر لا والندم كله اغيوم
تبرق مآسي وذكريات وتوجد

وسالت على آثارها سر مكتوم
وحبر على اوراق التعاسة تمدد

بطلت حب ومهزلة عشق مهدوم
بطلت حب اللي غلاها يتعدد

خلاص يا قلبي ترى منت ملزوم
طلق محبتها وانا جيتك اشهد

خلك خلي يا قلب وتعيش محروم
وارتاح من هم الليالي وارقد


قفله


أنا ضحية والظروف البسنّي
ثوب الشقا وانا بـ لبسه تحليت

متناقضٍ ابكي واسولف وأغنّي
هذه حياتي لو رفضت وتناسيت

قولي خطأ قولي كثير التجني
أنا ادري إني فوق ماقلت عانيت

وسلامتكم